مو كل خامة ملمسها زين تكون ممتازة أو جيدة، ومو كل خامة غالية بالضرورة تكون الأنسب لك.
جودة القماش تعتمد على أكثر من عامل، والأهم إنك تتأكد من المصنع اللي مصنع الخامة وتبحث عن المصنع أو تسأل عن المصنع وتتأكد من أنها نفس بلد المنشأ لأن السوق فيه خامات تقليد كثيرة وفيه غش كثير عن بلد المنشأ. العوامل اللي تلاحظها قبل لا تختار القماش واللي يساعدك تختار وتفرق بين القماش اللي يناسبك:
١ – الملمس
أول شي راح تلاحظه لما تمسك الخام، هو ملمسه.
شوف إذا الخام مريح وناعم على اليد، لكن لا تعتمد على النعومة بروحها، لأن بعض الخامات تكون ناعمة بسبب طريقة التشطيب، والخامات الثانية يكون ملمسها مختلف بسبب نوع النسيج أو تركيبها.
٢ – النسيج
النسيج له دور كبير في شكل الخام، برودته، وقفته وحتى تحملها مع الاستخدام.
شوف النسيج عن قرب وتأكد إنه متجانس وما فيه اختلافات واضحة أو عيوب بالخيوط، وكل ما فهمت نوع النسيج أكثر، راح تعرف شنو تتوقع من الخام بعد التفصيل واللبس.
٣ – الوقفة والطيحة
جرب تمسك الخامة وتشوف حقتها وانسيابها واسأل البياع إذا الخامة طايحة أو فيها وقفة، والعكس القماش اللي وزنه خفيف تكون طيحته أكثر من الخامات اللي فيها وزن أثقل والعكس صحيح. القماش اللي فيه وزن يكون فيه وقفة ومتماسك أكثر ورسمي أكثر.
ما في وحدة أفضل من الثانية، لأن الاختيار يعتمد على الشكل اللي تفضله واستخدامك للخامة.
٤ – الشفافية
خصوصاً بالخامات الصيفية والبيضاء، انتبه لمستوى الشفافية.
الخامة الخفيفة ممكن تكون أبرد وأريح بالأجواء الحارة لكن بالمقابل تكون فيها شفافية أكثر. أما الخامات الأثقل أو ذات النسيج المتماسك، فعادةً تكون أقل شفافية.
المهم إن مستوى الشفافية يكون مناسب لك وللمكان اللي راح تلبس فيه الدشداشة.
٥ – شلون يطلع بعد التفصال؟
لا تحكم على الخام وهو مطوي بس.
فكر شلون راح يكون شكله بعد القص والخياطة: هل راح يحافظ على وقفته؟ هل راح يكون طايح؟ وهل وزنه ونسيجه يعطونك الشكل اللي تبيه؟
الخامة ممكن تعجبك وهي على الرف، لكن الأهم شلون تطلع عليك بعد التفصال.
٦– الجودة
وأخيراً، شوف تفاصيل الخام نفسه.
انتبه إلى تجانس اللون، انتظام النسيج، سطح الخام، وجود أي خيوط أو عيوب واضحة. التفاصيل الصغيرة ممكن تعطيك فكرة أفضل عن جودة تصنيع وتشطيب الخامة.
نصيحة قماش
القماش الزين مو شرط يكون الأنعم أو الأغلى.
القماش الزين هو اللي يجمع بين جودة التصنيع، الراحة، الوقفة والشكل المناسب لك ولاستخدامك.
عشان جذّي في قماش نحاول نشرح لك تفاصيل كل خامة، مو بس اسمها وسعرها، عشان تعرف شنو تشتري وتختار اللي يناسبك.
